قصة جدل عريقة وأزلية لكن الغريب فى الأمر إنها ليومنا هذا لا يوجد حل لهذه
القصة
من وجهة نظري بعد ما نعرف شوي عن هالمعاناة التى يواجهها جميع فئات الشعب
سأحولها إلى قضية رأي عام
وإن شاء الله بنكسبها
من زمان وأنا بتدايق من سيارات الأجرة وسواقين الأجرة بس اليوم
بقول وينك يا زمان لما صارت (سيارة الأوتوبينكا) مترضاش
فيك
ويا ريت على قد هيك أول ما تركب السيارة يا إما بتلاقي
الكرسي مش مريح يا إما الشباك مابفتح ولا بسكر بالنهاية بتحس انك ندمان ندم عمرك
علي ركبتك للسيارة
بعد قصة زيت القلي اللي كانوا يحطوه بدل البنزين
ما خلصت الله
لا يعيدها من ايام فى سيارات عندها القدرة على الاحتفاظ بالروائح لمدة طوووويلة
بتركب مرات فى سيارة بتشم ريحة طول الطريق شو هي مش عارف ما علينا احلى شئ لما تجيك
الحالة النفسية اللى بتشكك انه الريحة طالعة من عندك
فى ناس عندهم اعتقاد بإنه التاكسي هي ( سيارة الوالد )
بيطلع فى السيارة الأخ وبيعطي هالشيكل للسواق وإله خاطر يمدد فى السيارة وبيفرد
حاله على الآخر وبيحط ايديه على ظهر الكرسي ويا حبيبي لما تكون مش طايق حالك وواحد
من هالنوع قاعد وفارد حاله وانت الك خاطر تلطشوا كفين تعميه وتفتح الباب وترميه
برااا بتقول اللهم طولك ياروح الطيب احسن تعال احكي معه بالطيب لو سمحت شوي بس يا
أخ حبيبي أبو الشباب الله يخليك لأمك شوي ياعيني إن رد عليك بقول احم مع حركة بسيطة
وبسسسس (بده يرتاح الأخ صار دافع شيكل
)
وبمرة راكب
السيارة شايف الديك أرنب بفكرها فاضية لقيت صبية بالكرسي اللي ورايا وفاتحالي علي
نانسي عجرم أخاصمك آه أسيبك لا بأعلي صوت وقالبة السيارة ديسكو بطلع فيها نظرة
(ياعتبي علي هيك صبايا) اللي فهمتو الأخت انها نظرة( اعجاب) لا وقال بتخجل الاخت
بتنزل راسها بالارض ياحبيبي عالدلال مجبووووور تظل ساكت بجننو الصبايا
بنهفاتهم
بس أحلى شئ لما تركب مع سواق مفكر حاله مراد علمدار
و لا
مايكل
شوماخر(سواق رالي)وطاير على الطريق كأنه محمل معه أرانب مش بني
آدمين
فى سيارات ال 7 راكب الأربع
أبواب هاي
السيارة إحنا فاهمينها غلط صدقونى هاي بس الأماكن المخصصة للجلوس فيها كرسي السواق
والكرسي اللى جنبه غير هيك انسى الفكرة وكلنا عارفين ليش
واللى مش
عارف ليش يجرب يركبهم والله يبعتله بواحد xxxL ساعتها حيعرف انو باقي السيارة تابعة للسيارة اللي بعدها
مش لنفس السيارة .
مرات ربنا بيبعتلك بواحد حشاش بقعد فى الكرسي اللى جنب
السواق الساعة 12 الظهر فى شهر 7 وبولع سجارة وعشان ماحدا يحكي بقعد يفتح فى الشباك
اللى جنبه بكل قوة انه يعنى الأخ عامل احتياطه عشان الركاب
وهو مش مشكلة
وكل اللى فى السيارة مشكلة بس اللى قاعد وراه مباشرة فى الكرسي كل ما ينفض سجارته
الغلبان بينفض قميصه ولما تخلص السجارة إن ما أخدلو ساتر راح ينحرق وربنا اللي بستر
الله ببعتلك مرات فى ناس مفكرة حالها بتفهم بالزوق وهي بينها
وبين الزوق بلاد بيكون مركبلو نوع عطر غير قابل للاستعمال البشري ومبخبخ حاله
ومفحفح وبركب
فى السيارة لو في شئ بيطير فى الجو تبع السيارة صدقونى راح يموت من الريحة
بس هاد بنكن اله كل الاحترام والتقدير المصيبة لما تقعد جنب
واحدمش متحمم
من العيد وكل شوي تتطلع عشان تتأكد انه اللى جنبك مش ...
مرات بتركب مع سواق مفكر حاله شكسبير وبيقص فى هالقصص وكلهم تافهات
ومرات سواق
مفكر حاله
روميو فاتح اليسا الساعة 7 الصبح وتعال قوله يا زلمة الدنيا الصبح بقولك
اسكت اى هو فى بعد أليــســيــااا بفتح جميع أحرف الاسم يلا كلها
تواكيل
بس ألز شئ ممكن يصادفك لما يكون فى سواق من اللى عينيهم بيضة بس
الشيب اللي براسوا هو اللى محترمينو وحابب يطق حنك مع بنت بيبدأ معها مش انتى يا عم
من عيلة مدري
مين وهي
مابترد عليه بسكت وبرجع مش أبوكى أبو فلان مابترد بسكت وبرجع طب فلانة مابتعرفيها
أكيد ما لحقتيها لحد ما يوصلها للمكان اللى بدها
إياه
وفى سواقين بعد ما الديمقراطية انتشرت فى البلد من ساعة ما تركب فى السيارة
بتسمعه بيقول يا راجل احنا لاقيين نحلق عشان يرخصوا المواصلات طبعا انت هلأ بتقول
السلام عليكم اله وللركاب وهوا بيكمل هو شو بيعمل الشيكل هالأيام من الجامعة للشفاا
بشيكل والله ظلم شو اعمل فيه الشيكل آكل فيه ساندويشه فلافل ع باب
الشفااا
وبينكد عليك عيشتك وبيخليك تندم على اليوم اللى طلعت فيه من
البيت ويا ريت على قد هيك بحسسك انه انت السبب
على العموم انا حكيت من البداية انها قصة عريقة و
أزلية وان
حاولت تفكر فى حلول الها احتمال يصير معك شي من هالنوع بنفس
اليوم وبتنسي قصة الحلول
.